Darlithydd mewn Gwleidyddiaeth - Addysgu ac Ymchwil
Ysgol y Gyfraith a Gwleidyddiaeth
Mae Ysgol y Gyfraith a Gwleidyddiaeth yn awyddus i benodi ymgeisydd neilltuol i ymuno ag adran Wleidyddiaeth a Chysylltiadau Rhyngwladol - adran o fri byd-eang ym Mhrifysgol Caerdydd.
Mae'r Adran Wleidyddiaeth a Chysylltiadau Rhyngwladol yn rhan ddeinamig o sefydliad rhyngddisgyblaethol Ysgol y Gyfraith a Gwleidyddiaeth sydd wedi tyfu’n sylweddol mewn blynyddoedd diweddar. Rydym yn gymuned sy’n amrywiol ei safbwyntiau deallusol, gyda chryfderau hirsefydlog a gydnabyddir yn rhyngwladol ym maes damcaniaeth wleidyddol, gwleidyddiaeth Cymru a datganoli; hanes gwleidyddiaeth Prydain; a gwleidyddiaeth Ewrop a’r DU a pholisi cyhoeddus. Yn ystod y blynyddoedd diwethaf, mae'r adran wedi buddsoddi'n helaeth i ymgryfhau ymhellach ym maes cysylltiadau rhyngwladol a gwleidyddiaeth fyd-eang. Bellach, mae ganddi broffil ymchwil cryf mewn meysydd sy’n cynnwys hanes y rhyfel oer; gwleidyddiaeth niwclear; theori ryngwladol feirniadol; trefedigaethedd ac ôl-drefedigaethedd; astudiaethau rhywedd; gwleidyddiaeth amgylcheddol; astudiaethau milwrol ac astudiaethau cudd-wybodaeth; a chyfraith ryngwladol. Mae ymchwil ac addysgu ar draws yr adran yn manteisio ar amrywiaeth o ddulliau gweithredu deallusol a methodolegol. Ymhellach, mae bod yn rhan o Ysgol y Gyfraith a Gwleidyddiaeth yn cynnig cyfleoedd i arloesi ar draws ffiniau disgyblaethol ym meysydd addysgu ac ymchwil.
Mae is-ddisgyblaethau ar draws Gwleidyddiaeth a Chysylltiadau Rhyngwladol yn cymryd rhan weithredol mewn pum cytsêr ymchwil rhyngddisgyblaethol ar draws Ysgol y Gyfraith a Gwleidyddiaeth: Llywodraethu Byd-eang: Cymru, Ewrop a thu hwnt; Gwrthdaro, Diogelwch a Chymdeithas; y Gyfraith a Gwleidyddiaeth Technoleg; Cyfiawnder Cymdeithasol a Dyfodol Amgen; a Chenedlaethau'r Dyfodol a Chynaliadwyedd. Mae'r meysydd hyn yn datblygu amgylchedd ymchwil ddeinamig trwy amrywiaeth o weithgareddau, gan gynnwys datblygu grwpiau darllen a chyhoeddiadau ar y cyd, mentora, sesiynau cymorth gyda gwaith ar y gweill, datblygu ceisiadau am arian ar y cyd, a gweithdai. Disgwylir i ymgeiswyr gyfrannu o’u harbenigedd yn y meysydd eang hyn gan gryfhau proffil yr Adran ymhellach.
Rydym yn ceisio penodi ymgeisydd rhagorol i ymuno â'r Ysgol fel Darlithydd mewn Gwleidyddiaeth Gradd 6 gydag arbenigedd mewn ymddygiad gwleidyddol meintiol, seicoleg wleidyddol, a/neu farn y cyhoedd, gyda diddordeb arbennig mewn ymddygiad etholiadol mewn systemau aml-lefel.
Mae gennym ddiddordeb arbennig mewn ymgeiswyr y mae eu harbenigedd yn estyn ac yn ategu’r arbenigedd presennol yn yr adran yn y maes hwn.
Bydd gan yr ymgeisydd llwyddiannus broffil ymchwil cryf sy'n gymesur â'u cyfnod gyrfa. Disgwylir iddynt gyfrannu at ymchwil a gweithgareddau eraill sy'n gysylltiedig ag ymchwil yn yr Ysgol.
Bydd gan yr ymgeisydd llwyddiannus allu amlwg i ddarparu addysg o safon uchel a disgwylir iddynt gyfrannu at raglen addysgu'r adran ar lefelau israddedig ac ôl-raddedig. Mae profiad blaenorol o addysgu dulliau meintiol ar lefel israddedig a/neu ôl-raddedig yn cael ei werthfawrogi'n arbennig, yn ogystal â phrofiad o weithio gyda dyluniadau arbrofol a/neu ddata arolwg hydredol ar raddfa fawr.
Disgwylir i'r ymgeisydd llwyddiannus gyfrannu at lwyddiant yr ysgol drwy ymgymryd â rolau gweinyddol o fewn yr Adran, yr Ysgol, a'r Brifysgol yn ôl yr angen.
I gael rhagor o wybodaeth am yr Adran a'i gwaith, cysylltwch â Dr Jon Kirkup, Pennaeth yr Adran Gwleidyddiaeth, ar [email protected]
Gwefan: https://www.cardiff.ac.uk/cy/law-politics
Mae'r swydd hon yn amser llawn ac yn barhaol, i ddechrau yn semester cyntaf neu ail semester blwyddyn academaidd 2026-2027.
Cyflog: £41,046 - £46,049 y flwyddyn (Gradd 6)
Dyddiad hysbysebu: Dydd Gwner, 24 Gorffemaf 2026
Dyddiad cau: Dydd Gwener, 21 Awst 2026
Mae Prifysgol Caerdydd wedi ymrwymo i gefnogi a hyrwyddo cydraddoldeb ac amrywiaeth a chreu gweithle cynhwysol. Rydym o’r farn bod modd gwneud hyn drwy ddenu, datblygu a chadw ystod amrywiol o bobl o lawer o gefndiroedd gwahanol. Felly, rydym yn croesawu ceisiadau gan bobl o bob rhan o’r gymuned, beth bynnag fo’u rhyw, eu hethnigrwydd, eu hanabledd, eu cyfeiriadedd rhywiol, eu hunaniaeth draws, statws eu perthynas, eu crefydd neu eu cred, eu cyfrifoldebau gofalu neu eu hoedran. Rydym yn croesawu ac yn annog ceisiadau yn arbennig gan y rhai o grwpiau nad ydynt wedi’u cynrychioli’n ddigonol o fewn gweithlu'r Brifysgol, fel y rhai sy'n uniaethu fel LGBT+, o gefndiroedd ethnig leiafrifol neu'r rhai ag anableddau. Er mwyn helpu ein cyflogeion i sicrhau cydbwysedd rhwng eu gwaith a’u bywydau personol, byddwn hefyd yn ystyried cynigion i weithio’n hyblyg neu rannu swydd.
Caniateir i geisiadau gael eu cyflwyno yn Gymraeg, ac ni fydd cais a gyflwynir yn y Gymraeg yn cael ei drin yn llai ffafriol na chais a gyflwynir yn Saesneg.
Mae Prifysgol Caerdydd wedi llofnodi Datganiad ar Asesu Ymchwil (DORA) San Francisco, sy'n golygu y byddwn, wrth wneud penderfyniadau cyflogi a dyrchafu, yn gwerthuso ymgeiswyr ar sail safon eu hymchwil, nid ar sail metrigau cyhoeddi na'r cyfnodolyn y mae'r ymchwil wedi’i chyhoeddi ynddo. Ceir rhagor o wybodaeth yma: Asesu ymchwil yn gyfrifol - Ymchwil - Prifysgol Caerdydd